ചന്ദ്രയാന്‍ 2 ബഹിരാകശത്തേയ്ക്ക് പറക്കുമ്പോള്‍ ഇരിങ്ങാലക്കുടക്കാര്‍ക്കും അഭിമാനിക്കാം ബഹിരാകാശ വാഹനത്തിന്റെ സുപ്രധാന ഉപകരണങ്ങള്‍ നിര്‍മ്മിച്ചത് കോണത്ത് കുന്നില്‍

News Special News

ഇന്ത്യയുടെ രണ്ടാം ചാന്ദ്രപര്യവേക്ഷണ ദൗത്യമായ ചന്ദ്രയാന്‍-2 പേടകത്തെയും വഹിച്ച് ഐ.എസ്.ആര്‍.ഒയുടെ ‘ഫാറ്റ്‌ബോയ്’ ജി.എസ്.എല്‍.വി-മാര്‍ക്ക് ത്രീ (എം-1) റോക്കറ്റ് വിജയകരമായി വിക്ഷേപിച്ചു. ആന്ധ്രപ്രദേശിലെ ശ്രീഹരിക്കോട്ടയിലെ സതീഷ് ധവാന്‍ ബഹിരാകാശ നിലയത്തില്‍ നിന്ന് ഉച്ചക്ക് 2.43 നായിരുന്നു വിക്ഷേപണം. ഒരാഴ്ച നീണ്ട കാത്തിരിപ്പിനും ആശങ്കകള്‍ക്കുമൊടുവില്‍ തകരാറുകള്‍ പരിഹരിച്ച് എല്ലാ പരിശോധനകളും പൂര്‍ത്തിയാക്കിയാണ് ചന്ദ്രയാന്‍-രണ്ടിന്റെ യാത്ര. ചന്ദ്രയാന്‍ 2 ബഹിരാകശത്തേയ്ക്ക് പറക്കുമ്പോള്‍ ഇരിങ്ങാലക്കുടക്കാര്‍ക്കും അഭിമാനിക്കാന്‍ ഏറെയാണ്. ഐ.എസ്.ആര്‍.ഒ.യുടെ ചരിത്രത്തിലെ ഏറ്റവും സങ്കീര്‍ണമായ ഈ ദൗത്യത്തിനായുള്ള ബഹിരാകാശ വാഹനത്തിന്റെ ഗതിനിര്‍ണയ സംവിധാനത്തിലെ സുപ്രധാനമായ എച്ച്പിഎസ് 3 ഫ്‌ളക്‌സ് സീല്‍ നിര്‍മ്മിച്ചത് കോണത്തുകുന്നിലെ വജ്ര റബ്ബര്‍ പ്രോഡക്ട്‌സിലാണ്. ഫ്‌ളക്‌സ് സീല്‍ മുകളിലേക്കുള്ള മര്‍ദത്തെ ശരിയായ രീതിയില്‍ നിയന്ത്രിക്കുന്നതുകൊണ്ടാണ് ഉയരങ്ങളിലേക്ക് റോക്കറ്റിനെയും ഉപഗ്രഹങ്ങളെയും ഭ്രമണപഥത്തിലെത്തിക്കാനാവുന്നത്.

ഇതിനു പുറമെ ചന്ദ്രനെ ഭ്രമണം ചെയ്യുന്ന ഓര്‍ബിറ്റര്‍, ചന്ദ്രോപരിതലത്തിലേക്ക് ഇറങ്ങുന്ന ലാന്‍ഡര്‍, പര്യവേഷണം നടത്തുന്ന റോവര്‍ കൂടി ഉള്‍പ്പെടുന്ന ചന്ദ്രയാന്‍ രണ്ടിന്റെ റബ്ബര്‍ അടിസ്ഥിത സാങ്കേതിക ഭാഗങ്ങളില്‍ ചിലത് ഇവിടെയാണ് നിര്‍മിച്ചത്. ഇന്ത്യയുടെ ചൊവ്വാ പര്യവേഷണ പേടകം മംഗള്‍യാന്റെ ഡയറക്ഷന്‍ കണ്‍ട്രോള്‍ യൂണിറ്റ് ഫ്ളക്സ് സീല്‍, ചന്ദ്രയാന്‍-1എന്നിവയുടെ വിജയകരമായ വിക്ഷേപണത്തില്‍ ഉപയോഗിച്ച റോക്കറ്റുകളുടെ ഫ്‌ലക്‌സ് സീലുക്കളും വജ്രയിലാണ് നിര്‍മിച്ചത്. അനുബന്ധ ഘടകങ്ങളായ റബര്‍ ഗാസ്‌കെറ്‌സ് ബുഷുകള്‍, ഇന്ത്യയുടെ ഭൂഖണ്ഡാന്തര ബാലിസ്റ്റിക് മിസൈല്‍ അഗ്‌നി 5 ന്റെ ഫ്‌ളക്‌സ് സീല്‍ എന്നിവ നിര്‍മിച്ചതും വജ്രയിലാണ്. നേവല്‍ ഡിഫെന്‍സ് രംഗത്തും വജ്രയുടെ ഉല്‍പ്പന്നങ്ങള്‍ ഉപയോഗിക്കുന്നുണ്ട്. ഇന്ത്യ വികസിപ്പിച്ചെടുത്ത ആദ്യ ന്യൂക്‌ളിയര്‍ പവേര്‍ഡ് ബാലിസ്റ്റിക് മിസൈല്‍ സബ്മറൈന്‍ ആയ അരിഹന്തിന്റെ പല പ്രധാന ഘടകങ്ങളും വജ്രയിലാണ് നിര്‍മിച്ചത്. പ്രതിരോധ വകുപ്പിനിന് വേണ്ടിയും പല ഉപകരങ്ങഭാഗങ്ങളും തദ്ദേശീയമായി നിര്‍മിച്ചു 85 കോടിരൂപ വജ്ര രാജ്യത്തിന് ലാഭമുണ്ടാക്കികൊടുത്തു. ഇന്ത്യ തദ്ദേശീയമായി നിര്‍മിച്ച അണുവായുധ ശേഷിയുള്ള ക്രുയിസ് മിസൈല്‍ ആയ നിര്‍ഭയ് യിലെ ഗതിനിര്‍ണയ സംവിധാനവും ഇവിടെയാണ് നിര്‍മിച്ചത്. ചന്ദ്രയാന്റെയും മംഗള്‍യാന്റെയും വിക്ഷേപണത്തിന് ഉപയോഗിച്ച റോക്കറ്റിന്റെ പ്രധാന ഭാഗങ്ങളുടെ നിര്‍മാണത്തിലും മികച്ച പ്രവര്‍ത്തനം കാഴ്ചവയ്ക്കാനായി. രണ്ടു ദശകത്തിലധികമായി ഐഎസ്ആര്‍ഒയും പ്രതിരോധ വകുപ്പുമായി വജ്ര സഹകരിച്ച് പ്രവര്‍ത്തിക്കുന്നു. കോണത്ത്കുന്ന് പൈങ്ങോട് ആണ് വജ്രയുടെ ഫാക്ടറി. എംഡി പി എസ് സജീന്ദ്രനാഥ്, എക്‌സി. ഡയറക്ടര്‍ ജി ശബരിനാഥ്, ഡയറക്ടര്‍മാരായ കണ്ണന്‍, പ്രശാന്ത് എന്നിവരുടെ നേതൃത്വത്തിലാണ് വജ്രയിലെ ഗവേഷണനിര്‍മാണ പ്രവര്‍ത്തനങ്ങള്‍ നടക്കുന്നത്. ചന്ദ്രനെ ഭ്രമണം ചെയ്യുന്ന ഓര്‍ബിറ്റര്‍, റോവറിനെ സുരക്ഷിതമായി ചന്ദ്രോപരിതലത്തിലിറക്കുന്ന ലാന്‍ഡര്‍ (വിക്രം), പര്യവേക്ഷണം നടത്തുന്ന റോവര്‍ (പ്രഗ്യാന്‍) എന്നിവ ഉള്‍പ്പെടുന്ന ചന്ദ്രയാന്‍-2 53 ദിവസങ്ങള്‍ക്കു ശേഷം സെപ്റ്റംബര്‍ ആറിന് ചന്ദ്രോപരിതലത്തിലിറങ്ങും.